Straight News

Warga Tingkir Tengah Khurmat Calon Jamaah Haji

Kathah warga Desa Tingkir-tengah kutha Salatiga sesarengan tindak dhateng griyanipun bapak Fatoni. Masyarakat desa sami khurmat (nguntapaken) tindakipun calon jamaah haji, Bapak Fatoni (61th) sekaliyan ibu Endang (58th). Bapak Fatoni sekaliyan menika tumut rombongan kutha Salatiga kloter 47. Adicara dipunwiwiti dinten setu, 28 September 2013, wanci tabuh 10.27WIB kanthi atur pangandika dipunlajengaken dedonga sesarengan antawis calon jamaah haji kaliyan para warga ingkang dipunpimpin dening bapak KH Basirun. Adicara kalaksanan ing ngajeng griyanipun Bapak Fatoni kanthi khidmat. Para warga sedaya ndherek dedonga kanthi pangajap supados calon jamaah haji rahayu saking bebrayan lan dados haji ingkang mabrur. Adicara saklajengipun adzan lan iqomat saha kapungkasan kanthi mushofahah. Bidhalipun saking griya tumuju kantor Pemkot Salatiga wanci tabuh 10.55WIB. dipundherekaken kulawarga kaliyan tangga tepalih kathah-kathaipun 5 mobil. Sedaya calon jamaah haji kutha Salatiga kempal wonten Pemkot Salatiga sakderengipun bidhal dhateng asrama haji Donohudan, Solo. 

Feature

Keunikan Nama Ngajeng Tiyang Bali

roombucketdotcom.blogspot.com

           Menawi dipunsebataken tembung “Bali” mesthi tiyang menika sampun gadhah pamanggih menawi pulo Bali menika dipuntepang kaendahan alamipun, ugi budaya-budayanipun ingkang taksih kenthel lan kathah ingkang unik .Bali menika sampun dipuntepangi ing jagad negari amargi kathah keunikan ingkang dados budayanipun Bali. Dados menawi tindak dhateng Bali menika mesthi saged manggihi para turis ingkang sami pengin mangertos kadospundi sejatosipun Bali ingkang endah.

Kathah sanget keunikan menawi sampun dumugi wonten ing Bali, saben desa menika gadhah tradisi piyambak-piyambak, sedaya menika dipunraosaken khas sanget, amargi sedaya tiyang Bali menika taksih nyengkuyung menapa kemawon budaya ingkang taksih dipuntindakaken dening masyarakat Bali. Salah setunggal budaya ingkang dereng kathah dipunmangertosi dening masyarakat umum kadosta masyarakat Jawi, Sumatra, Kalimantan lan sanesipun, inggih menika budaya maringi nama ngajeng putranipun tiyang Bali. Mesthi kathah ingkang bingung, amargi nama-nama ngajengipun tiyang Bali menika kathah ingkang sami, kadosta wayan, made, nyoman, kethut. Nama menika boten waton amargi nama-nama ngajeng kados menika gadhah teges piyambak-piyambak. Nama ngajeng tiyang Bali menika minangka tandha tepang tiyang kasebat putra kaping pinten.

News Feature

Raos Sumelang Tukang Becak Pancal

Ngayogyakarta minangka kutha wisata sampun sakyektosipun dados tujuan para turis saking manca. Katahipun papan-papan ingkang saged dipundhatengi ndadosaken Yogya rame kahananipun. Becak minangka salah satunggalipun piranti transportasi ingkang sampun asring dipunpanggihi wonten margi-margi dhaerah Ngayogyakarta. Kanthi nitih becak, para turis utawi masyarakat lokal menika saged gampil anggenipun manggihi papan ingkang pinuju. Nah, sinten ingkang mangertos wujudipun becak? Sampun sakyektosipun para masyarakat Indonesia, mliginipun Jawa tamtu mangertosi wujudipun becak, sukur-sukur sampun nate nitih. Piranti ingkang gadhah rodha ingkang cacahipun tiga menika biasanipun namung saged momot kalih utawi tigang penumpang. Nalika numpak becak raosipun eco sanget, kenging angin sumilir saking njawi lan ugi saged ningali kahanan sakiwa tengenipun. Becak minangka salah satunggalipun piranti ingkang dipunginakaken dening masyarakat lokal kangge pados nafkah, kangge kabetahan gesangipun ingkang samsaya dangu samsaya kathah.