News Feature

Raos Sumelang Tukang Becak Pancal

Ngayogyakarta minangka kutha wisata sampun sakyektosipun dados tujuan para turis saking manca. Katahipun papan-papan ingkang saged dipundhatengi ndadosaken Yogya rame kahananipun. Becak minangka salah satunggalipun piranti transportasi ingkang sampun asring dipunpanggihi wonten margi-margi dhaerah Ngayogyakarta. Kanthi nitih becak, para turis utawi masyarakat lokal menika saged gampil anggenipun manggihi papan ingkang pinuju. Nah, sinten ingkang mangertos wujudipun becak? Sampun sakyektosipun para masyarakat Indonesia, mliginipun Jawa tamtu mangertosi wujudipun becak, sukur-sukur sampun nate nitih. Piranti ingkang gadhah rodha ingkang cacahipun tiga menika biasanipun namung saged momot kalih utawi tigang penumpang. Nalika numpak becak raosipun eco sanget, kenging angin sumilir saking njawi lan ugi saged ningali kahanan sakiwa tengenipun. Becak minangka salah satunggalipun piranti ingkang dipunginakaken dening masyarakat lokal kangge pados nafkah, kangge kabetahan gesangipun ingkang samsaya dangu samsaya kathah.

Jaman samsaya majeng kamangka sakmenika jinisipun becak piyambak sampun ngrembaka. Boten namung becak pancal ingkang taksih tradisional, ing jaman modern menika malah wonten ingkang nami Betor (Becak Motor). Wujudipun inggih menika becak ingkang sampun dimodifikasi kaliyan motor ngangge mesin. Sakwontenipun betor ing pinten-pinten dhaerah Ngayogyakarta menika ndadosaken raos sumelang para tukang becak pancal, amargi para penumpang menika katah-katahipun langkung milih betor tinimbang becak pancal, betor dipunraos langkung cepet anggenipun dugi wonten papan ingkang pinuju, boten namung kelangan penumpang, becak motor menika kathah-katahipn  ngangge mesin ingkang boten wonten seratipun kados STNK utawi mesinipun batangan utawi ilegal, pramila Gubernur DIY (Daerah Istimewa Yogyakerta) medalaken serat edharan Nomor 55.1/0136 Babagan Larangan Pengoperasian Becak Bermotor 24 Januari 2003. “Ananging Kebijakan ingkang sampun dipundamel menika boten wonten kasilipun, saged dipuntingali taksih kathah betor ingkang dipunpanggihi wonten ing margi-margi dhaerah Ngayogyakarta, dados miterat kula pemerintah menika boten tegas kaliyan kabijakan ingkang sampun dipunandharaken”, ngendikanipun Bapak Suyitno (48taun) rikala dinten senen 30 September 2013. Bapak Suyitno menika padamelanipun namung dados tukang becak pancal dhaerah Ngayogyakarta ingkang aslinipun saking Pati. Sakderengipun dumugi Yogya, pak Yitno menika sampun dumugi tlatah Manado, Kalimantan, Sumatra, lan dhaerah Jawi kadosta Surabaya, sedayanipun menika namung kangge nyekapi kabetahan gesangipun lan kulawarga ing Pati, inggih menika garwanipun, ibu Rujati ingkang padamelanipun namung buruh krupuk, lan putranipun kekalih ingkang namung tamat ngantos SMP. Taun 2006 sakbibaripun gempa ing Ngayogyakarta, Pak Yitno miwiti padamelanipun minangka tukang becak pancal ing Ngayogyakarta. “Kasilipun saking menika boten kathah namung pas-pasan, kadhang wonten kadang nggih boten, kangge nedha ngih namung pas-pasan,  paling sedinten namung pikantuk sekawan penumpang, kadhang kala malah namung setunggal, nanging alhamdulillah saged damel bea manten anak kula, nggih sedaya menika disyukuri mawon,” tuturipun pak Suyitno ing dalu menika.

“Kendharaan sakmenika samsaya kathah, sainganipun ugi kathah, napa malih betor, sanadyan aturanipun sampun cetha saged dipuntingali betor ing Ngyogyakarta samsaya dangu malah samsaya kathah amargi kirangipun penertiban saking Dinas Perhubungan.” Ngendikanipun pak Yitno. Kamanga para tukang becak pancal kadosta bapak Suyitna menika gadhah pangajap supados Pemerintah Dhaerah saged nggencaraken penertiban becak motor ing  Ngayogyakarta. Menawi perkaranipun amargi papan ingkang damel wadhah betor ingkang kenging razia menika boten wonten, kedahipun Pemerintah saged ngupakara pados lahan kangge nampung betor kala wau.