Feature

MUSEUM DEWANTARA KIRTI GRIYA 

Rikala dinten minggu kapungkur kula sakanca mlampah-mlampah dhateng perpustakaan Tamansiswa ingkang dumunung ing Jl. Tamansiswa No.31, Yogyakarta ingkang sejatosipun namung badhe pados naskah Jawi ingkang ngagem aksara jawa minangka tugas panaliten filologi. Dinten menika ugi nembe sepisan kula mangertosi  papan panggenan  dumunungipun perpustakaan kasebat. Sasampunipun pikantuk naskahipun, lajeng kula mlampah-mlampah ing ngajeng saha kiwa tengenipun perpustakaan. Kula penasaran pomahan ing ngajeng perpustakkan menika isinipun menapa. Nalika kula mlebet, boten dinyana wonten barang-barang unik ingkang taksih katata rapih saha resik.

 Sanalika kula mlampah-mlampah wonten ing salebetipun museum. Museum menika kathah ngawrat nilai-nilai pendidikan saha minangka salah satunggaling bukti sejarah ngrembakanipun pendidikan Indonesia. Museum Dewantara Kirti Griya menika gadhah pinten-pinten koleksi  ing antawisipun prabot griya ingkang taksih katata sami kaliyan wekdal Ki Hajar Dewantara manggeni griya kasebat. Wonten ugi foto-foto , meja makarya Ki Hajar Dewantara, ageman kunjara samangsa piyambakipun taksih nglampahi ukuman pamerintah Londo, buku-buku koleksi piyambakipun, radio ingkang dipunangge piyambakipun, mesin ketik,  telepon kina kagunaganipun Ki Hajar Dewantara, kamar sare, teken, kaca paningal, pulpen , saha sapanunggalanipun taksih kathah ingkang dereng kula sebataken. Ingkang narik kawigatosan kula inggih menika sabun ingkang kangge siram pungkasan saderengipun Ki Hajar Dewantara wafat, sampun pinten-pinten puluh taun ananging taksih wonten wujudipun. Menapa kemawon ingkang wonten ing salebetipun dalemipun Ki Hajar Dewantara menika nggambaraken kaprasojan piyambakipun minangka pejuang bangsa.

Jumenengipun Tamansiswa saha penganggit slogan Tut Wuri Handayani  panjenengannipun Ki Hajar Dewantara, jasanipun  ing donya pendidikan menika ageng sanget kamangka dumugi samenika dinten miyosipun Ki Hajar Dewantara 2 Mei dipipunpengeti minangka dinten pendidikan nasional, saengga pikantuk gelar pahlawan nasional. Kanyata Museum Dewantara Kirti Griya ingkang menika tilaran Londo jaman rumiyin ingkang nate dipunanggeni  Bapak Pendidikan Indonesia inggih menika Ki Hajar Dewantara sakulawarga, wiwit taun 1938 dumugi taun 1957. Wiyaripun bangunan 300 meter persegi saha wonten ing lemah ingkang wiyaripun 5.594 meter persegi. Bangunanipun gadhah keunikan arsitektur gaya klasik Belanda Jawi. Saking cariyos-cariyos jaman rumiyin griya menika dipunjumenengaken kirang langkung taun 1925.

Museum ingkang dipunresmekaken 2 Mei 1970 dening Nyi Hajar Dewantara minangka pangarsa umum Tamansiswa, menawi nama museum kasebat dipunsukani dening Hadiwidjono tiyang ingkang ahli Basa Jawi. Namaewantara, lajeng Kirti menika ateges Pakaryan (Sansekerta), Griya menika tegesipun omah. Dados, nama museum menika saged dipuntegesi  “omah ingkang isinipun asiling pakaryan Ki Hajar Dewantara.” Saking koleksi saha swasana museum menika, nggambaraken gesangipun Ki Hajar Dewantara jaman rumiyin, piyambakipun nglampahi gesang ing antawis buku-buku saha asiling pikiran ingkang sae. Pengunjung ugi saged maos Buku-buku ingkang ngangge basa Belanda ingkang dados sumber inspirasi Ki Hajar Dewantara nalika ngrembakaaken pendidikan ing Indonesia.

Fasilitas ingkang wonten ing Museum Dewantara Kirti Griya antawisipun perpustakaan, mushola, wc saha pendhapa taman siswa ingkang saged dipunginakaken kangge nampilaken seni-seni tradhisional, saha saged ugi kangge gladhen tari Jawi dening para siswa. Menawi pengin tepang langkung kathah kaliyan Ki Hajar Dewantar saha ningali kadospundi museum manika gampil mawon. Saged dipun padosi wonten ing Jl. Tamansiswa, Yogyakarta. Bikakipun dinten selasa-kemis surya 08.00 – 13.00, dinten jumat 08.00 – 11.00, saha dinten setu 08.00 – 13.00. sumangga menawi kersa napak tilas gesangipun Ki Hajar Dewantara ing Museum Dewantara Krti Yogyakarta.