TINGKEBAN
Tingkeban inggih menika salah
satunggaling wujud tradhisi saking asiling penggalihipun masyarakat Jawi ing
jaman rumiyin, kanthi pangajap supadis dipunparingi putra ingkang dipun pengini
dhateng calon bapak, ibu saha kulawarga ageng sarta supados anggenipun
nglairaken menika saged lancar tanpa alangan setunggal punapa. Tradhisi menika
dipunpitados wiwit jaman Jayabaya ingkang dipun warisaken turun tumurun ngantos
samenika saha dipunlampahi kathah-kathaipun masyarakat Jawi.
Tingkeban saged ugi dipunwastani
mitoni, minangka urutaning upacara ing pagesangan ingkang dumugi samenika
taksih dipunlampahi masyarakat Jawi. Upacara tingkeban menika minangka salah
satunggaling adat utawi upacara ingkang dipunlampahi wonten ing wulan kaping
pitu samangsa tiyang estri menika ngandhut sepisanan kanthi ancas supados
jabang bayi ingkang dipunkandhut saha calon ibu ingkang saweg ngandhut menika
pinaringan keslametan. Amargi wonten ing piwulang Islam menika minangka
pakurmatan nalika mlebetipun ruh wonten ing raga jabang bayi kanthi ancas
supados dipunparingi ruh ingkang sae saengga putra ingkang miyos menika
samangke gadhah tumindak ingkang sae ugi.
Pinten-pinten urutanipun adicara
tingkeban kirang langkung mekaten, ingkang sepisan inggih menika pamaosan ayat
suci Al Quran dipunlajengaken sungkeman calon ibu dhateng garwanipun saha
sungkeman calon ibu saha bapak dhateng tiyang sepuhipun. Adicara salajengipun
siraman, siraman menika dipunlampahi dening pitung tiyang sesepuh ing kulawarga. Cidhuk ingkang
dipunagem damel siraman menika cidhuk ingkang kadamel saking klapa ingkang
taksih wonten isinipun saha ngandhapipun dipunbolongi. Sasampunipun siraman,
calon ibu dipunagemi kain 7 werna, kanthi pralambang sipat-sipat sae ingkang
badhe dipunbeta dening si jabang bayi ing salebeting kandhutan.
Acara pantes-pantes inggih menika calon
ibu dipun agemi kain saha kebaya 7 macem. Kain kebaya ingkang sepisan ngantos
ingkang kaping enem minangka busana ingkang nedahaken busana ingkang
sejatosipun dereng panten dipun agem sening calon ibu. Sasampunipun dipun agemi
busana ingkang kaping pitu menika nembe pantes, kahanan menika minangka
pralambang menawi ibu ingkang saweg nagndhut menika saenipun boten menggalih
menapa kemawon ingkang asipat kadonyan saha tumindakipun prasaja kemawon.
Calon ibu salajengipun dipuntaleni
padharanipun (dipunkendhiti) kanthi janur kuning. Janur ingkang dipuniket kedah
dipunkethok dening calon bapak si jabang bayi kangge mbuka tali ingkang dados
pepalang miyosipun si jabang bayi. Janur ingkang kaiket menika dipunkethok
ngangge keris ingkang pucukipun dipunparingi kunir minangka tolak balak.
Adicara salajengipun inggih menika brojolan klapa gadhing cacah kalih ingkang
dipungambari Kamajaya kaliyan Kamaratih ingkang ngemot kekarepan supados
putra/putri saged lair bagus utawi ayu saha nggadhahi sipat kadosta tokoh watang
kasebat. Salajengipun angrem, inggih menika calon ibu lenggah ing tumpukaning
kain ingkang kala wau dipunginakaken ing adicara pantes-pantes kadosta pitik
wadon ingkang saweg ngangremi tiganipun. Adicara menika gadhah pangajap supados
si jabang bayi saged miyos ceka wulanipun. Salajengipun dhahar ajag cowek, ing
ngriki calon bapak si jabang bayi ngrencangi calon ibu wonten ing tumpukan kain
saha kekalihipun mendhet dhaharan ingkang sampun dipun cawisaken kanthi cowek
saha dipundhahar ngantos telas. Acara menika kalampahan kanthi pangajap supados
si jabang bayi saged tuwuh kanthi sehat. Menika urutaning adicara tingkeban.
Upacara mitoni utawi tingkeban
menika gadhah piwulang kangge para masyarakat. Antawisipun kain-kain ingang
dipu agem dening calon ibu menika gadhah teges piyambak-piyambak. Saking teges
kasebat kita saged mendhet piwulangipun, manungsa menika dipun cipta dening Allah SWT, kita kedah tliti sarta
kedah ngrantam kadospundi kita gesang ing donya menika ingkang kathah godha
senengipun. Menawi manungsa menika gadhah ancas gesangipun ingkang tumuju
akhirat supados boten kacelik ing pungkasanipun samangke. Kamangka manungsa
menika kedah ngronce gesangipun piyambak-piyambak, menapa kemawon ingkang badhe
dipuntuju saha ngelingi menawi sasampunipun gesang ing donya menika wonten
gesang ing salajengipun inggih menika akhirat dados manungsa menika boten
namung mulya ing donya, ananging mulaya ugi wonten ing akhirat samangke. Dados
upacara tingkeban menika sae kemawon menawi katindakaken dening masyaraket
amargi ing upacara adat menika kathah pangajap maring Gusti ingkang Maha
Kuwaos.
Tidak ada komentar:
Posting Komentar