Ngimpi Tuku Tas
Dening :Rae
Dening :Rae
Ing
sawijining esuk, katon bocah-bocah kang lagi mangkat sekolah. Ana kang numpak
pit, ana kang diterke bapak ibune, ana uga kang padha mlaku bebarengan, amarga
sekolahane ora adoh banget, mung mapan ing pinggiring desa.
Santi
salah sawijining siswa kelas 5 kang melu ngrameni dalan sakbarenge padha
mangkat sekolah. Ibune Santi asmane Bu Tiyem, pakaryan saben dinane dodol
gorengan keliling desa. Merga kuwi Santi bisa urip prasaja. Sanadyan bocah ayu
kuwi lagi kelas 5 SD, nanging dheweke wis bisa mikir diwasa, ora kaya bocah
cilik liyane. Santi wis ngerti karo kahanan keluargane, dheweke ora tau duwe
panjaluk kang werna-werna, kadhang malah ngrewangi ibune dodolan. Beda karo mbakyune
kang wis kelas loro SMP, gaweane kepengin tuku kaya sing diduweni kancane. Rina
mbakyune santi ora tau ngerti kahanan wong tuwane. Karepe apa wae kang
dipingini kudu keturutan, nanging sanyatane ora bisa kabeh keturutan amarga
ibune uga mung pas-pasan. Jaman kelas siji SMP biyen, Rina wis tau kepingin
tuku pit merga kancane akeh sing duwe pit anyar kanggo menyang sekolah, banjur
ibune usaha sebisane. Sanajan pite ora anyar, nanging saiki Rina wis bisa
mangkat sekolah numpak pit sing ditumbaske ibune.
Tekan
sekolahan, Santi nyelehake gorengan kang dititipi ibune ana kantin sekolah
banjur mlebu kelas lan melu pelajaran kaya biasane. Pas arepe nyathet katerangan
saka bu guru, dumadakan santi kaget “lho.. pulpenku kok ora ana ya, kayane mau
bengi wis cetha tak lebokke ana tas.” Santi ngomong dhewe karo gemremeng.
Sanalika Santi meneng lan ngeling-eling, apa iya wis dilebokke tenan. Diyah kancane sakbangku jebul keprungu
gemremenge Santi, “Ana apa San, kok
katon kaya wong bingung ngono” Diyah nakoki Santi. “ iki Yah, pulpenku kang
taklebokake ana tas mau bengi kok saiki ora ana ya”, Santi tambah bingung. “
Wis ora usah dipikir dhisik, iki aku duwe pulpen loro, koksilih dhisik ora popo
San, pulpenmu dipikir mengko wae yen wis rampung pelajaran.” Guneme Diyah. “Iya
Yah, matur nuwun ya wis nyilihi pulpen.” Santi seneng. Banjur bocah loro mau
nggatekake bu guru anggone nerangake pelajaran.
Theng..theng..theng...(wis
wayah ngaso). Jam pelajaran wis entek, banjur bu guru maringi PR kanggo di
garap ana ing omah. Pelajarane banjur dilereni marang bu guru. Santi kelingan
karo perkara pulpene sing ilang mau, banjur bali nggoleki maneh. Ora dinyana
jebul tase Santi suwek. “Oalah.. iki to sebape pulpenku iso ngilang,”
guneme Santi nang jero ati. Dheweke ora ngelingi menawa tase mau wis di enggo
pirang-pirang taun ora tau ganti. Santi wis ngerasa lega amarga perkara pulpene
ilang wis cetha.
Jam
sekolah wis rampung, Santi wis biasa bali bareng Diyah. Saktekane ngomah, Santi
banjur jupuk benang jait sak dome ana ing laci, banjur tas kang suwek mau
didondomi dhewe. Santi wis pinter ndondomi barang kang suwek amarga awit cilik wis jaluk warah nalika weruh ibune
ndondomi klambine Santi kang suewk merga kecanthol paku. Santi ora wani matur
nyuwun tas anyar amarga ngerti kahanan ibune kang sarwa pas-pasan.
Nalika
Santi lagi ndondomi tas kang suwek mau, dumadakan ibune kondur saka bakul
gorengan. “lagi ngapa kuwi ndhuk..?” ibune takon. “niki bu nembe dondomi tas
ingkang suwek” Santi mangsuli. “apa ya wis maem? yen durung kana maem dhisik,”
ibune ngongkon Santi. “inggih bu sekedap malih nggih sampun rampung.” Sakrampunge
Santi dondomi banjur dheweke mangkat maem kang wis dicawisake ibune ana
meja.
Srengenge
wis arep mendelep tandhane wis arep maghrib. Santi kaya biasane, sakdurunge
adzan wis wudlu banjur menyang langgar cedhak omahe. Santi kuwi pancen bocah
pinter, patrape apik, tur manut karo ibun. Bapake wis seda wiwit Santi isih TK,
seda kuwi pancen wis dadi takdir, nanging kang jalari bapake Santi seda kuwi amarga
tiba saka wit klapa. Merga kuwi Santi mesakke marang ibune kang nggolek biaya
dhewe kanggo sekolah dheweke lan mbakyune. Sakbaline Santi saka langgar. Santi
banjur bukak PR kang diwenehi bu guru mau awan. Samsaya wengi anggone garap PR,
Santi wis krasa ngantuk. Santi kelingan menawa dheweke durung shalat isya’,
merga PR-e ya wis rampung Santi age-age wudlu lan shalat banjur mapan ana ing kasur amarga mripate wis
kari limang watt. Bengi kuwi santi ngimpi dijak ibune menyang pasar, banjur ibu
menggok ana toko tas, Santi dikon milih tas kang dipingini. Banjur Santi milih
kang werna biru, merga biru kuwi werna kasenengane. Santi pringas-pringis
sakbaline saka pasar.
“Ndhuk..ndhuk..
wis subuh iki, ayo ndang tangi..” ibune nggugah anggone turu. Ngimpine sing
apik mau wis ilang, banjur Santi mikir-mikir, “oalah.. jebul gur ngimpi to,
rasane kok kaya tenanan,” batine Santi. Dheweke banjur tangi saka anggone
turu lan siap-siap mangkat sekolah.
Saknaline
Santi saka sekolahan, Santi arep leren ana kamar. “lho.. kok ana tas anyar
werna biru, kuwi duweke sapa ya?,” takokne Santi neng jero ati. Banjur di
cedhaki ana kertas neng ngarep tase, nalika diwaca tulisane jebul tas kuwi mau
saka ibu. Tulisane ngene “tas iki duewke dhek Santi, amarga dhek Santi wis bisa
dadi bocah sing apik, sing manut marang wong tuwa, mula ibu tumbaske kanggo
hadiah, sanajan tase ora apik banget, muga-muga dhek Santi seneng lan tambah
sregep sinau supaya gegayuhane bisa keturutan, ibu nyuwun ngapura mung bisa
numbaske sing kaya ngene”. Banjur Santi mbrebes mili maca tulisan ibune, ora
dinyana ngimpine mau bengi dadi nyata.
Tidak ada komentar:
Posting Komentar